السبت، 26 يونيو 2010

!!! انت والحصان


وقع حصان أحد المزارعين في بير ميه عميقة ولكنها جافة
وبدأ الحصان بالصهيل .... واستمر كده ساعات طويله
كان المزارع وقتها  بيفكر اذاى يطلع الحصان؟
لكن مطولش التفكير علشان يحاول  يقنع نفسه بأن الحصان عجوزاً
وأن الفلوس اللى ح يدفعها علشان يخرجه من البير  قد الفلوس
 اللى ح يشترى بيها  حصان غيره
ده غير ان البير جافة من زمان قوى  وتحتاج إلى ردمها بأي شكل من الاشكال
وفعلا نادى المزارع على جيرانه وطلب منهم مساعدته في ردم البير
علشان يحل مشكلتين في وقت واحد،وبكده يبقى ضرب عصفورين بحجر واحد التخلص من البئر الجاف
ودفن الحصان العجوز بتاعه
وبدأ الكل بالمعاول والجواريف في جمع التراب والنفايات ورميها في البير
 حس الحصان وعرف حقيقة  اللى بيحصل
أخذ في الصهيل بصوت عالى مليان ألم وطلب النجدة
وبعد شويه من الوقت اندهش الكل لما لاحظوا انقطاع صوت الحصان فجأة
وبعد عدد قليل من الجواريف، بص المزارع إلى داخل البير وصعق من اللى شافه
شاف ايه ؟؟
شاف ان  الحصان مشغول بهز ظهره
كل ما تسقط عليه الأتربة بيرميها على الأرض
ويرتفع هو خطوة واحدة لأعلى واستمر الحال على كده
الكل يلقي بالتراب والأوساخ إلى داخل البير فتقع على ظهر الحصان
فيهز ظهره فتسقط على الأرض ويرتفع خطوة بخطوة إلى فوق
وبعد ما قرب  يتملى البير
اقترب الحصان للاعلى و قفز قفزة بسيطة وصل بها إلى خارج البيربسلام
انا حاسه يا شباب ان ممكن تكون قصتك وقصتى ذى الحصان ده
 وان الحياة ترمى بأوجاعها وأثقالها علينا
ومهما حاولنا  أن ننسى همومنا فهي مش ح تنسانا
وتفضل ترمى اوجعاعها  وألمها من  نفسها علينا

عارفين ان كل مشكلة تواجهنا  في الحياة ما هي الا شويه تراب واوساخ
لازم  ننفضها من ظهرنا علشان نتغلب عليها
ونرتفع خطوة خطوة للأعلى
وبكده نقدر نلاقى نفسنا فى  يوم من الايام على القمه

اوعى تتوقف ولا تستسلم أبدا خلى قلبك خالي من الهموم
مهما حاسيت أن الآخرين عايزين دفنك حيّاً
خلى عقلك خالياً من القلق
وعيش حياتك ببساطة ومحبه
واستمر فى العطاء اكثر واكثر  وتوقع أن تأخذ القليل فقط
توكل على ربنا واطمئن انه عادل
ورحيم  وحنين وح يبعتلك النجده فى الوقت المناسب

أنشر الموضوع فى المفضلات الاجتماعية من هنا



Digg Technorati del.icio.us Stumbleupon Reddit Facebook Twitter

17 التعليقات:

BNT ELISLAM يقول...

مو ضوع جميل جدا وفعلا ممكن تكون حكايه الحصان حكايتى وحكايتك وملاين غيرنا
بس المهم من الى يقدر يستخدم ارادته وويفضل عنده امل ويشغل دماغه زى الحصان
الخصان فى الاول نادى واستدم صوته عشان غيره يساعده بس لمل لاقى الغير مفهوش فايد استخدم اسلحته وهى جزء من جسمه استخدم ارادته وميئسشى

هو ده اللى المفورض نعمل احنا كمان ادام اى مشكبه نستخدم اسلحتنا الى عقلنا واردتنا
ونصمنم اننا نكون ناجين

اسفه انى طولت

بس مجد موضوع جميل جدا
ومدونه اجمل
لك احترامى وتقديرى

mrmr يقول...

بنت الاسلام
اهلا ومرحبا بيكى
انتى شرحت معنى الدرس صح وانا اتعلمت الدرس كويس قوى
اتمنى من الكل انهم يتعلموه مش بس كده وان يكونوا عندهم الاراده القويه لتحقيقه علشان ينجوا بنفسهم ويوصلوا الى بر الامان
نورتينى
ربنا معاكى ويحافظ عليكى

افروديت يقول...

جدموضوع جميل وليه مغزي عارفه يامرمر أيه اللي بيعجبني في كتابتك لماتابعتكأنك بتقولي حاجات حقيقية بتوصلنالنتايجمش كلام وخلاص..قصة بهاعبرة جميلة أحيكي عليها..سلام

mrmr يقول...

افروديت
ازيك يا قمر
خطوه عزيزه تملى بيقولها عندنا فى الصعيد لما حد يجى زياره
وكمان بيقولوا تسلم خطوتك
اتمنى تكونى اتعلمتى الدرس ذى ما انا اتعلمته
ربنا معاكى ويحافظ عليكى

غير معرف يقول...

السلام عليكِ
الفاضلة : مرمر
كيف الحال ؟

اسعدتني واسرتني هذه التدوينة الإيجابية جداً

نعم أنا مقتنع بكل كلمة فيها
لا فُض فوك

باحث عن حب يقول...

الله اكبر جميل جمال ملهوش ميثال ولا عشان شبه الغزال لا
شبه الحصان
مش عارف بقه المهم
الحصان انا بحبه قوى بس عمرى ما ركبته
يااااه
الحصان فكر واتصرف ونجى بنفسه
ياريت نتعلم
ياريت نتعلم
كتير قوى بتمر بيا اوقات احباط احباط اخرها امبارح
المهم لازم نواجه الازمات
لازم

mrmr يقول...

أ / احمد شريف
اهلا بيك
نورتنى
ومدونتى زادها شرف بزيارتك
واتمنى ان الكل مش يقتنع وبس
ويحاول جاهدا على الصمود والنجاه بنفسه ليصل الى بر الامان ولا يستسلم ابدا
شكرا ليك واسعدنى مرورك

mrmr يقول...

حمد الله بالسلامه يا حوده
فينك يا عم الحج
انت ترمى البوست بتاعك كده من غير ما تنتظر منا زيارتك
انا اتعودت على وجودك ديما فى مدونتى
انت صاحب بيت ( اقصد صاحب مدونه )

انا كمان بحب الحصان قوى وعمرى ما ركبت حصان
نفسى بجد يا محمود انزل قريه من القرى واركب حصان
بس لللاسف انا ماليش حد فى اى قريه
ايه بقه حاله الاحباط اللى كنت فيها امبارح دى
قولى بس انا ذى والدتك ههههههه
متخفش سرك فى بير محدش ح يعرفه غير اصدقائنا المدونين
ههههه
ربنا يسعد اوقاتك ويزيل عنك اى احباط
ربنا معاك ويحافظ عليك

أتنين حبيبين يقول...

قد ايه قصه جميله اوووى
تعرفى والله يامرمر حسيتها جامد
وجميله اوووى
كان نفسى حد يقولى عليها
لو تعرفى قد ايه اتظلمت كتير وصابره وعايشه وبحمد ربنا على كل حال
وعوضنى ربنا بأحلى حسام بالدنيا
رغم انه بيعانى معايا الظلم ومافيش حد بيسبنا فى حالنا
لكن هنقول ايه
قد ايه انا ارتحت شويه لما شفت القصه دى

جميله اوووى
ربنا يصبرنا على ما بلانا يارب

دمتى حببتى بكل الخير
توتا

أتنين حبيبين يقول...

على فكره مش عارفه ليه البوست ده مش ظهر عندى على الرغم من اخر بوست لسه موجود
انا مميز جدآ
ممممممممممممممممم

حاجه غريبه
انا عمرى ما هيفوتنى اى بوستات ليكى يامرمر والله
اكيد البلوجر هيس كده لوحده
يلا عامة حصل خير
حبيبتى
ووعد منك لو عملتى بوست وانا مش شفته تعرفينى عشان اجى بالله عليكى

mrmr يقول...

توتا الجميله
اشكرى ربنا انه عوضك خير
ولولا حبك ده صادق مكنش يدوووم ويدووم
ربنا يفرح قلبك
بس مش عارفه ليه البوست ده مظهرش عندك وعند ناس تانيه كتير
ابقى ابحث وادور
ولا البلوجر يكون بيهيس !!!
يالا هى جات عليه هو يعنى فيه ناس كتير مهيسه بجمله
نورتينى يا قمرايه
ربنا معاكى ويحافظ عليكى

عفوا أنا أميرة يقول...

مرمر القصه دى بحبها جدااا، بصرف النظر أنى بعشق الحصنه وبجد فيهم القوة إلا إن القصه دى كلها على بعضها رائعه رااائعه وقوية، تسلمي على العرض المتميز

mrmr يقول...

اميره حبى انا
او عفوا انا الاميره
اهلا بيكى يا قمرايه
فعلا مش بحس الانسان اللى ممن نستفاد من اختباراته والآمه بل الحيوان ايضا ممكن يكون عبره نتعلم منها درس يفيدنا فى حياتنا كمثال الكلب الوفاء النمله والنحله العمل فى صمت وغيرهم وغيرهم
يارب بس نتعلم ونجاهد
نورتى ومرسى على زيارتك يا جميل
ربنا معاكى ويحافظ عليكى

Ramy يقول...

مرمر

القصة جميلة بالفعل

دة صحيح لازم ناخد كل التجارب اللى بنمر بيها فى حايتنا انها تدفعنا لقدام

مش بس التجارب الأيجابية لا و كمان تجاربنا اللى فشلنا فيها لان ممكن نطلع من التجارب دى بدروس نقدر تدينا حاجات تساعدنا فى حايتنا اللى جاية

نظرية نصف الكوب المليان


يمكن انا ذكرت حاجة زى كدة عندى فى البوست اللى كتبتة و انتى نورتينى فية

ان بالرغم انى فشلت فى تجربتى بس شفت اللى انا كسبته من ورا التجربة دى لقيته كتير صدقينى كفاية انى كسبت ناس كويسة زيكم

بجد بوست جميل جدا

و انا كنت رغاى جدا (:(: العادى يعنى (:(:

بس ان شاء الله دى مش الزيارة الأخيرة

ربنا يوفقك (:

mrmr يقول...

رامى
مرسى جدا لتلبيه الدعوه
كان فعلا يهمنا رايك فى المدونه كا كل مش بس فى البوست ده
انت شرفتنى
وانا سعيده جدا بيك
ربنا يديم المحبه والود ويكون معاك ما يكون عليك

Ramy يقول...

على فكرة الموضوعات كلها جميلة انا عملت مسح سريع كدة

بس الموضوعات المطروحة جميلة وشيقة وقيمة

مش زى مدونات تانى (:(: الكلام عليا (:(:

بس على فكرة انا عملت متابعة للمدونة بس مظهرش اخر موضوع بتاع الحصان مش عارف ليه


يكون معاك ما يكون عليك

على رايك بفهمها وهى طيره (:(:(:

فينك يا ماجد يا كدوانى (:(:

بجد انا مبسوط جدا

mrmr يقول...

رامى
انا برضه مش عارفه السبب
وحاولت ابحث واعرف السبب برضه معرفتش
انا عنجد ( بالصعيدى دى ) سعيده بيك جدا
شكرا ليك ومتحرمش منك ابدا ومن خطوتك
بس ابقى تعالى ومعاك كيس جوافه مش بايدك فاضيه هههههههه

template by Osama hosny 2009