!!!! أنا مميز جدا جدا
اكيد كتير فكرت انت شكلك ايه وقعدت تسأل ناس كتير عن رأيهم فيك
اللى يقولك رأى حلو تفرح بيه وتزقطط
واللى يقول مش اوى نفسيتك تتعب ويجيلك احباط..
تطلع السما شوية
وتتهبد على الارض شوية تانيه
مش بس كدة
أكيد كمان كتير كنت بتسأل عن رأيهم فى شخصيتك
وطبعاً الاجابات كانت اصعب !!
وتفضل كدة طالع نازل مش راسى على بر
لكن ليه عمرنا ما بنفكر ننسى كل الاراء بتاعت الناس عننا دى
وناخد رأى نفسنا فى نفسنا بس من غير ما تظلم نفسك
او تمدحها زيادة
خليك امين مع نفسك اوعى تصدق اللى يقول انا متواضع
مش باحب اتكلم عن نفسى.
التواضع هو انك تكون عارف مقدار نفسك كويس
عارف انك انسان طبيعى مش كامل فيك الوحش اوى
وفيك الحلو اوى
فيك الحنيه وفيك القسوه فيك الشراسه وفيك الطيبه
يعنى التواضع هو انك لما حد يسألك عن نفسك تتكلم عنها
مش تسأله عن رأيه هو فيك
وتذكر انك
"انت هو من تصدق انه انت "
صدق نفسك انت و اقبل شكلك على انه منحه من ربنا
وشخصيتك على انها هديه من ربنا لازم تستثمرها
وتصلح فيها وتنميها وتستغلها احسن استغلال بكده تقدر
الناس تشوفك ذى ما انت حلو الطبع وهتصدق فيك وهتقبلك
ذى ما انت
وكون على يقين تام انك انت مفيش منك اتنين
وانت حد مميز اوى اوى عند ربنا
صدقنى هو شايفك كدة
مميز جدا جدا
أنشر الموضوع فى المفضلات الاجتماعية من هنا
15 التعليقات:
ايه الجمال ده كله
عثل عثل عثل
اسود بالطحينه طبعا طعمه بيكون حكايه بس العثل ده عثل ابيض جبلى
من الخليه مباشره
من القلب والله يوصل للنخاشيش
ولا ايه ياعم الحاج اقصد ياستى الحاجه الكبيره ؟
ازاى انا الاكبر بس الاصغر منك؟
ممكن افهم الفزوره دى
؟
بصى
الانسان ديما الصوره اللى بيرسمها لنفسه الناس بتشوفه بعينه هو
مش بعنيها
فاكره الاعلان بتاع الصابون زمان على صابونه كاميه بتقول فيه البنوته اللى المودل فى الاعلان بس كانت بنوته كبيره شويه ههههههه
بتول لان الانطبا عالاول يدوم دوما
ولا ايه؟
وايه اخبار التنميه البشريه دى اللى انتى
ماشيه فيها الايام دى؟
بس
لوك جديد وفكر جميل باسلوب اروع
والله
معلش بقه يا بنت العم
طولت عليكى
سلامو عليكو على رأى جنى ست الحسن
كل واحد منا فيه الخير وفيه الشر
هو الموضوع جميل وهيبقا تمام اوى بس اللى يقدر يعمله مع نفسه زى ما قلتى كده
انا لما حاولت اعمله مع نفسى جيت اوى على نفسى
وشردت نفسى احلا تشريد
تحياتى يامرمريتا
اهلا يا سوهاجى
بس انا مش بحب العسل لا الاسود ولا الابيض
اصلى انا بحب الهبر
ادينى هبر على قد ما تقدر
شكرا ليك يا بلدياتى
دمت فى سعاده
اهلا يا دولى
اكيد مش ح تنجحى من اول مره
ده عايز اراده وتكرار مرات عديده
مش سهل ابدا لكن حاولى اكيد ح توصلى
للنتيجه المرجوه
ربنا يديم عليكى السعاده
السلام عليكم ورحمه الله
والله عندك حق
ثقه الناس فى الواحد تنبع من ثقته فى نفسه
يعنى الواحد لو شايف في نفسه حاجه حلوه واقتنع بيها هيقدر يعكس ده على اللى قدامه
ويخليه يحس بالحاجه دى
وجميل برضه انه يقعد مع نفسه ويشوف رأيه فيها ايه
ويسمع اراء الناس
ويحاول يعرف ايه الشبه والاختلاف بينهم
عشان لو الصوره مش واضحه للى قدامه صح
يوصلهالو صح
بجد بوست جامد
تقبلى ردى...
مرحبا هدير
مرسى يا عمرى على زيارتك ومرورك
وفعلا كلامك فى الصميم عندك مليون حق
ربنا معاكى ويحافظ عليكى
موضوع جميل
وكلمات اروع
ربنا يسعدك يارب احيك على جهدك الرائع فى جميع مدوانتك
وانا ضفتهم كلهم عندى للمتابعه
دمتى بكل الخير
توتا
توتا
شكرا يا قمر
اتمنى ليكى النجاح
ربنا معاكى ويحافظ عليكى
عايزين الولايات المتحدة الإسلامية تقوم لازم نودود لبعضنا عشان تقوم ..
ودود يا ودود .. وَدوِد .. ودوادا .. وَد (بفتح الواو).. وِد .. (بكسر الواو)
لازم تتودوادو بها (اشتغلوا وسبحوا بها .. صبح وليل .. ليل وصبح .. داخله خارجه .. خارجه داخله) وانشروها.
كلام جميل بس فيعلبا للعاوز يبقى كويس فى ناس عاجبها نفسها كده
بس الاجمل انها تحاول تشوف نفسها من وجهه نظر تانيه اكيد هتلاقى فيها عيوب عاوزه تتصلح يمكن لما تصلحها تبقى احسن يكتير
ام الخلود
نورتى يا جميل
بنت الاسلام
اهم شئ فى الدنيا الرضا
علشان كل واحد يحب حياته ويحب نفسه كما هى
نورتى يا قمر
الحمد لله الواحد لازم يكون راضى على نفسه ونبص لعيوبنا ونحاول نصلح منها ومنستناش حد يجى يقولنا دا حلو فيك ودا وحش ولازم نكون على قدر من الثقه بالنفس وناخد فى الاعتبار رأى اقرب الناس
ومفيش فيكى ياكون واحد كامل والكمال لله وحده عز وجل
واحب نفسى زى ما انا مش زى ما الناس عايزهوواحاول اغير الاسوء للاوحش
والجميل ان دى ميزه ربنا خلقنا بيها هى تميز العقل وتصحيح الخطاء
لكل واحد فينا مميز بشىء معين
كل واحد بيتميز بأشياء جمي له موجوده فيه ونابعه منه ومش مصطنعه
الموضوع جميل وفى غايه الروعه وقابل للمناقشه من زوايا كثيره
دمتى جميله ومميزه يامرموره
كتبت اغير الاسواء للاوحش
عذرا
الاسواء للاحسن بالتأكيد
حبك جميل
طبعا عندك حق لازم ناخذ راى اقرب الناس لينا بس مش اى ناس
انا بالنسبه لى لا اثق غير فى راى شخص واحد فقط وحاليا انا مفتقداها راى ماما
هى كانت الوحيده اللى اثق جدا فى كلامها لانها مهما حدث سوف تتمنى لي الافضل
هو فعلا موضوع جميل كبير ومش ممكن ينتهى
نورتنى وشرفتينى ويارب ما اتحرم من زيارتك ليا
ربنا معاكى ويحافظ عليكى
إرسال تعليق