السبت، 20 نوفمبر 2010

برئ يا بيه


العواف عليكم
يا مراحب .. يا مراحب
ايه الدخله دى ... معلش بقه
 الدخله جديده عليكم باعتبار اننا قاعدين
كده فى دوار العمده
عقبال أمالتكم .. وبأقر واعترف
الاعتراف ده دعوه أقدمها ليا حاتم
صاحب مدونه شقاوى
وأنا من مزنقى هذا باشكره على الورطه المنيله بستين نيله
اللى ورطهانى لكن أعمل إيه ما باليد حيله
أدبست وخلاص
أقر وأعترف وأمرى لله

1- اعترف انى زوجه وأم لكن ليا  قلب طفله عمرها ما ح تكبر ابداً مهما بقيت عجوزه وكركوبه  وثنانى مكثره وانى بعشق زوجى وبغير عليه لدرجه الجنون طبع منيل لكن اعمل ايه مش بايديا  . 
2- اعترف انى اعشق قاعده البيت ومش بحب الفسح ولا السفر والمره الوحيده اللى سافرت فيها وحدى كان يوم التجمع وكنت عايله الهم وخايفه قوى أصل أختكم بتغرق فى شبر ميه .
3-أعترف أنى أنسانه بسيطه ولا أنا هاديه ولا شقيه  وأنى حساسه جداً لدرجه اى كلمه ممكن  تزعلنى من حبايبى وأخد على خاطرى جداً ومش بروق ولا اهدى بسرعه .
4- أعترف أنى عصبيه ومقدرش أهدى أبداً غير لما أكسر إى حاجه قدامى لدرجه أنى ممكن أكسر الاطباق الصينى والكبايات القزاز  وارجع أندم علشان أنا اللى بلمهم  فى الاخر ههههههههه  .
5- أعترف أنى بحب القصص المثيره والمرعبه وبموووت فى أفلام مصاصى الدماء وأستمتع بمناظر الرعب
 6 -اعترف انى بنزل الشغل واوقات كتيره بازوغ علشان أجرى على البيت علشان أجهز الغداء وأنى ست بيت شاطره بخبز عيش شمسى أنما ايه .... حكايه وأسلق بيض ممتاز هههههه ( كده وكده علشان الحسد ) 
7- أعترف أنى رومانسيه جدا وطيبه قوى بس طيبتى دى ممكن تدخلنى فى مشاكل كتير أنا فى غنى عنها وأنى بضايق جدا لما  حد يتجاهلنى ويهتم باى شئ آخر وأنا قاعده معاه .
8- أعترف أنى جوايا كسر كبير لفقدانى أمى ومش ممكن الكسر ده يداوى ولا باقى عمرى  لدرجه أنى بقيت أكره شهر سبتمبر جداً لان ده  الشهر اللى فقدتها فيه وأفضل طول الشهر فى حاله أكتئاب مزمن ومحدش يقدر يخرجنى من الحاله دى أبداً لغايه ما يعدى ذكرى وفاتها .
9- أعترف أنى بحب الضحك جداً وأحب أرسم الضحكه على اللى حوليا أن شنطتى ولا درج مكتبى ما يخلوش أبداً  من الحلويات والبسكويتات .
10- أعترف أنى بكون فى قمه سعادتى لما أقدر أساعد حد محتاجلى بجد وبحترم أدميه الانسان قوى وبعلم بناتى أنهم يحترموا الصغير علشان الصغير يحترمهم بالنسبالى  فاطمه ذى كرستين الاثنين حبايبى .
11- أعترف أنى بعشق الطرب الاصيل وأغانى الزمن الجميل الست سومه وأسمهان لكن الاغانى الشبابيه مش بتستهوانى لكن بسمع قليل منها .
12-أعترف أنى مش بحب أدين إى شخص  علشان لا أدان فيما بعد وبحب التمس العزر للاخرين  .
13- أعترف أنى مقدرش أبداً أتخلى عن واجبات العزاء لكن أقدر أتخلى عن وجبات الافراح  وأنى بحب اللمه والصحبه الحلوه وكل يوم خميس بيبقى عندى تجمع عائلى يجمع عائله زوجى واولادهم وازواجهم وده طقس لابد منه بقاله سنين .
14- أعترف أنى لما أكون فى ضيقه أدخل غرفتى وأقفل عليا بابى وأفضل أصرخ لربنا علشان يريح قلبى ويفك ضيقتى ومش بحب اقول سرى لحد .
15-أعترف أنى بحسن الظن فى كل اللى حواليا إلى حين يثبت عكس ذلك  وأن قلبى مفتوح لاى شخص يحب يحكيلى مشاكله وطالب النصيحه والمشوره .
 16-أعترف أنى بحب الصراحه ذى ما أحب غيرى يكون صريح معايا وأكره الكذب والنفاق والنفخه الكدابه والشخص اللى يقولى أنا بعرف فلان بيه واقعد مع فلان باشا وهو أصلا شخص منفوخ على الفاضى وبتاع كلام وبس وبيحب يترسم علينا .
17- أعترف أنى فى بعض الاحيان ببقى قاسيه وحازمه فى بعض الامور اللى تستحق ذلك طبعا علشان أقدر امسك زمام الامور .
18- أعترف أنى مش بحب حد يستغل حبى لشغلى ويحملنى شغله علشان هو يزوغ براحته .
19- أعترف أنى حياتى كلها منحصره فى بيتى وزوجى وبناتى وشغلى وبس و مش بحب أتدخل فيما لا يعنينى ولا أفرض نفسى على الاخرين .
20- واخيراً اعترف انى بحبكم كلكم يا أجمل صحبه وأجمل مدونين

وبس  كفايه كده أعترافات
لحسن حاسه أن فى حد ح يحدفنى بالطوب
من كتر أعترافاتى ورغي الكتير
وأحب أدبس اصدقائى كلهم لكن ح اكتفى بـ
محمود ( باحث عن حب )
هدير ( بنت الاسلام )
كاسبر ( همسات قلب )
سندباد ( فكره )
اسامه حسنى ( شريكى فى المدونات )
كارمن ( البوم الذكريات )
معلش سامحونى لو كنت ورطكم
بس ده علشان بحبكم
اقعدوا بالعافيه



أنشر الموضوع فى المفضلات الاجتماعية من هنا



Digg Technorati del.icio.us Stumbleupon Reddit Facebook Twitter

18 التعليقات:

باحث عن حب يقول...

خبز عيش شمسى أنما ايه

ايوة كده
بس امسك حرامى
عيش شمسى ده انا محروم منه يا مرمر
الف هناوشفا

اعترافات جميله جدا
كوكتيل مشاعر
رومانسيه عصبيه
محبه
ايه ده كله
قصص رعب
وايه ده كله بس
يارب
يحافظ على اسرتك
يارب
ويديكى الصحه دايما
ايون انا صح فى ورطه
بس
ورطه جميله وحلوة
من عنيا
هعترف
حالا
بس بعد شويه علشان البوست اللى لسه منزله
البوست القادم ان شاء الله

BNT ELISLAM يقول...

ايه الاعترفات الجامده دى
لالالاللا مكنتش اعرف اننا ناس جامدين كده
واحلى تدبيسه باذن الله
هنزلها بس شويه كده عقبال مانفسيه تتظبط
وادعيلى بقى

Casper يقول...

اعترافات خطيرة
بس ليه التدبيسة دي ههههههه

ربنا ييسر وانزل الاعترافات في اقرب وقت
تقبلي مروري

Casper

سندباد يقول...

ههههههههههههههههههههههه
شكرااااااااااااااااا
بارك الله فيكي صراحة
هي دي الصحوبية ولا بلاش
ماشي ياسيتي مقبولة حاضر

Carmen يقول...

ماااااشي يامرمر دي العيدية برضه:))) تدبيسة زي الفل بصراحة
تتردلك برضه^_^
تسلمي حبي وربنا يستر

Tears يقول...

جميلة اعرتافاتك و اسلوبك سلس

واضح ان جواكى طيب اوى

دمتى بحب عزيزتى

Unknown يقول...

سعيده اني اتعرفت عليكي أكتر و فيكي حاجات كتير مني خصوصاً موضوع الغيره ده ههههه
تحياتي و ربنا يحفظك انتي و أسرتك الجميله

Ms Venus يقول...

مرمووووووورة


ايه الاعترافات الجميلة اوى دى

بجد جميلة لانها عرفتنا عليكى اكتر يا قمراية

ربنا يحميكى ويحمى اسرتك الجميلة ياارب

ويملا حياتكم بالسعادة


ورداية جميلة ورقيقة لعيونك

غير معرف يقول...

ربنا يبارك لك فى حياتك واسرتك
اعترافات جميله
وشخصية طيبه زى ما عرفتك
كل اعتراف وانتى طيبه
تحياتى

افروديت يقول...

الله ..الله أخيرآآآآآآ مرمرأعترفت وبأيه

بأسرار دوله ....... بس برافو بتعرفي تسلقي بيض والله شاطرة وموهوبه ياجدعان ..... هههههههه ضحكتيني
وفكرتيني بوالدي الله يرحمه لماحكيتي عن والدتك ربنايرحمها

أنابحبك يامرمروبجدوالله سواء اتكلمتي عن نفسك الحبة الصغننين دول أو لأ مرمر هي مرمر القمر ست الكل

ربنا يخليكي لكل الناس اللي بيحبوكي

سلام ياقلبي

Noha Saleh يقول...

انتى طيبة اوى يامرمر
ايه الاعترافات دى كلها
على فكرة انا عارفة ان العيش الشمسى ده حلو اوى
ياسلام بقى لو تكتبيلنا الطريقة:)

ツSmiLeY AnGeLツ يقول...

بجد شخصية طيوبة وحبوبة ورمنسية
شعرت انك متواضعة وفيكي حب الام لاولادها واهم شي عارفة نفسك
ربنا يوفقك ويخلي اولادك واسرتك لي.
سلامي لاجمل ارق مرمورتي.

جايدا العزيزي يقول...

هههههههههههههه

الطماطم رخصت ياقلبى

شفتى الطوب ممكن يجرح وانا قلبى عليك

وبعدين انت مين هههههههههههه

بتجاهل وهشوف قلبك هيقدر يقسى عليا

بس ايه فى الجول


شخصيه جميله ومميزة

وحشانى ياقلبى

تحياتى

انــــــت حــــــــــياتى يقول...

مرمر
ايه كل الاعترافات دى ربنا يسعدك ويوفقك
بتسلقى بيض ممتازة
تحياتى ليكى

اسماء عبدالعزيز يقول...

اولا كل عام وانت بالف خير
ثانيا استمتعت كثيرا وانا بقرا اعترافك البسيط الواضح ..
وبجد ما اجمل روحك النقية
عجبتني الفكرة جدا
كوني بخير دائما

100 يقول...

ماشاء الله عليك
أعترافااات جميلة
وتدل على شخصيتك الواثقة من نفسها
والحبوبة والحنونة والمزااجية الغريبة ههههه
بس احلى حاجة انك يتزوووغي من الشغل ذكرتيني اياام الزوغااان هههه
ومبررروووك نجحتي في حل الواااجب
10على 10 و3 نجمااات هههه
وكل عاام وانتي بخير بعد الزحمة

richardCatheart يقول...

ههههههههههههههههههه دى فضايح يا مرمر ومش اعترفات الحمد لله انى ماليش فيها كنت انتحرت هههههههههههه

مدونه ما كفايه بقى يقول...

السلام عليكم

تعرفى ان اعترافاتك حببتنى فبكى جدااااااااا

بجد والله مش بجامل

لقيت حاجات مشتركه زى العصبيه والبساطه والغيره

بجد ارفع القبعه لاعترافاتك

تقبلينى صديقه لمدونتك الرااااااااائعه

تحياتى لكى والسلام عليكم

template by Osama hosny 2009