الأربعاء، 1 سبتمبر 2010

سؤال ... وجواب


فى البدايه أحب أشكر الاستاذ الفاضل صاحب هذه الدعوه ربنا يكرمه ويسعد أوقاته ويجازيه خيرا الاستاذ / ابو فارس صاحب مدونه
 فهى عباره عن بعض من الاسئله للتعرف عن قرب
على الاشخاص الذين نتعامل معهم عن بعد
 وبعض الكتب الذى يتناولونها
وافكارهم وشخصيتهم من  نوعيه هذه الكتب
أحب اقول فى البدايه انى مش من هواه القراءه
لكن من فتره لاخرى أقرا بعض الاشياء
التى تشد انتباهى
فلست من الاشخاص الذين يدمنون الكتب
نبدأ فى الاسئله
1. من أرسل لك الدعوة ؟

الاخ الفاضل ابو فارس الهمام
(( ده الاسم اللى بحب ديما اعلق به فى مدونته ))
 جزاه الله خيراً

2. ما هي كتب الطفولة التي بقيت عالقة في ذاكرتك؟

بصراحه وانا طفله مكنش ليا تقل على القراءه
لكن أتذكر والدى الله يرحمه كان دائما
يشجعنى على القراءه وياتى ببعض المغامرات والمجلات مثل مغامرات تان تان
ومجله سمير
ومجله ميكى
وكتاب الف ليله وليله
وفى كتير جدا بس باحاول اعصر دماغى مش جايبه
معايا اكثر من كده
اصل الذهايمر بعيد عنكووا حاجه وحشه قوووى

3. مَنْ أهم الكتاب الذين قرأتَ لهم ؟

ياتى فى المرتبه الاولى الكاتب والشاعر
قداسه البابا شنوده الثالث
ربنا يديم لنا حياته
وبعد ذلك من الكاتب احسان عبد القدوس ، انيس منصور  ، اجاثا كريستى 
 4. من هم الكتاب الذين قررت ألا تقرأ لهم مجددا؟

لم يمر عليا حتى الان  كتاب اقتنيته
واخذت موقف من كاتبه يستدعى ان اقاطع كتباته

5.في صحراء قاحلة ، أي الكتب تحمل معك؟

طبعا بدون شك الكتاب المقدس الذى هو كلمه الله
وبعض الكتب الروحيه التى تنمى الروح والعقل
ولا شئ غير ذلك 
6. ما هو الكاتب الذي لم تقرأ له أبدا ، وتتمنى قراءة كتبه ؟
يوجد كثير لم اقرأ لهم  واتمنى ارجع للقراءه مره اخرى
لكن ظروفى اليوميه لا تسمح حاليا
7. ما هي قائمة كتبك المفضلة ؟
اولا انا بحب جدا اقرأ الروايات وماليش تقل ابدا لاى كتب علميه أو فلسفيه علشان كده أخترت للقائمه  الموت السعيد ( ألبير كامى )
أنتقام العداله - الضحيه - الطائره المفقوده - الرجل الغامض  ( اجاثا كريستى )
وبعض الروايات ( لاحسان عبد القدوس )التى تحولت
إلى افلام مصريه بعد ذلك
مثل
العذراء والشعر الابيض
فى بيتنا رجل
النظاره السوداء
يا عزيزى كلنا لصوص
الخيط الرفيع
الرصاصه لا تزال فى جيبى
الطريق المسدود ........... وغيرها

اوراق على شجر  ، زمن الهموم الكبيره
( انيس منصور )
وايضا يوجد الكثير من الروايات بس
نكتفى بهذا القدر
8. ما هي الكتب التي تقرؤها الآن ؟

حاليا لا اقرأ شئ غير الكتاب المقدس
لانه شئ ضرورى لا يمكن الاستغناء عنه 

9. أرسل الدعوة لأربعة مدونين من أجل مشاركتنا بذكرياتهم مع القراءة ؟

انا حبايبى كتير صعب عليا أختار منهم أربعه فقط لأني أحب أن ارسل الدعوه للكل
لكن ما باليد حيله
فاخترت
1. مدونة بابى  ( رامى )

2. مدونة مجرد انسان ( الحب الجميل )

3. مدونة باحث عند حب ( محمود )

4. مدونة بصراحه ( ويكا)
واتمنى مكنش ورطت حد فى هذه الدعوه وكل يوم
والجميع بألف صحه وعافيه


( ملحوظه على جنب )
أنا عارفه بعد هذا البوست فى ناس كثير
مش تحب تدخل مدونتى
لكن أنا مش بحب لبس الاقنعه الزائفه
ومدونتى مفتوحه وأهلا وسهلا
بأصدقائى وأحبائى
ربنا يسعدكم يا احبائى ويحافظ عليكم
والف سلامه ليكى يا حبى الجميل
ربنا يعفى عنك وتقومى بالسلامه وتنورى مدونتك

أنشر الموضوع فى المفضلات الاجتماعية من هنا



Digg Technorati del.icio.us Stumbleupon Reddit Facebook Twitter

23 التعليقات:

باحث عن حب يقول...

السلام عليكم
اقنعه ايه يامرمر
احنا اخوات يابنتى واللى يقول غير كده يبقى
مش فاهم حاجه

احنا فى الاول والاخر مصريين
وفى الحروب اللى مرت علينا دماء المسلمين مع المسحيين اختلطت ومحدش كان عارف ده مسلم ولا مسيحى
كل واحد له الحق انه يعتز بدينه انا معتز بدينى وبالقرأن زى ما انتى معتزه بالكتاب المقدس
اهم حاجه انا مش بجرح فى دينك وده من تعاليم دينى وانتى مش بتجرخى فى دينى لانها دى تعاليم السيد المسيح عليه السلام
ومشكور على
الدعوه الجميله دى والله
جميله الاجابات يا مرمر
ومستنين البوست الجديد
يا مرمر
واللى مش عاجبه
ميدخلش
ولا ايه؟
سلام يا مرمر

mrmr يقول...

محمود
اسعدنى ردك حقا
ربنا يديم الحب بيننا
فالتعامل بين جنس البشر تعامل حب وود ورحمه

ربنا يسعدك ويحافظ عليك

رمضان كريم

Noha Saleh يقول...

ايه يابنتى اقنعة ايه اللى بتقولى عليها دى
انتى انسانة جميلة بجد
احنا طبعا اخوات وبعدين الدين لله وكل واحد طبعا بيعتز بدينه
على فكرة انا كنت بحب اقرأ ميكى وانا صغيرة ومجلة علاء الدين كمان

mrmr يقول...

نهى
حبيبه قلبى
احب اوضح شئ بالنسبه كلمتى الاقنعه الزائفه

فانا اقصد بيها شقين اثنين
اولهما : انى انسانه مش مثقفه ذى كثيرين
وكان من الممكن اجمع بعض اسماء الكتب واشهرها واضيفها لقائمه الكتب لكن حبيت اكون امينه مع نفسى قبل ما اكون امينه معاكم

ثانيا : يوجد ناس كثيرين لم يعلموا بديانتى واحساسى ان ده شق هام يجعل ناس كثيرين لم يقبلوا على المدونه

فهذا للتوضيح فقط للكل
فانتى عندك حق الف حق كل شخص بيحب دينه ومعتز بيه ولا يخجل منه لذا اقبلت بتلبيه الدعوه دون تردد نهائى
حتى لو انا انسانه غير مثقفه

واكرر شكرى للاخ الفاضل ابو فار س الهمام

ورمضان كريم

غير معرف يقول...

مرمر
أنتى عارفة راى الشخصى فيكى
ومش محتاجه أكتبة
أكيد أنتى بتحسية
ومحمود جاب الملخص
يسلم كلامك يا محمود
أجاباتك كلها جميلة

مرسيى يا حبيبت قلبى على الدعاء لى
ربنا ميحرمنيش منكم


مش قادرة أبعد عن المدونة ولا عنكم

هحاول أكلمك أن شاء الله
دمتى بخير

داليـ ـ ـ ـ ـ ـ ــــا يقول...

إجابات جميله أوى يامرمريتا

كمان القرأه دى شيئ لذيذ

له مذاق خاص كده

تحياتى ليكى ياأحلا مرمريتا

حـــواديت يقول...

عزيزتى مرمر

بعد ما صممتى انك تنزلى البوست ده رغم اعتراضى على محتواه وانتى عارفه

احب اقول قدام كل الناس
يسعدنى ويشرفنى أن نكون فريق عمل واحد وسوف نظل ونكون واحدا ما دامت هذة المدونات
واسعدنى اكتر نجاح معظم المدونات الى حد مرضى ومقبول نتيجة ثمره جهدك وتعبك
حـــواديت

Ramy يقول...

بدبسينى

هههههههههههههههههههههههههههههههههه

حاضر حاضر حاضر

انا مبحبش أجاثا كريستى خااااالص

علشان خاطرك انتى بس هبلعها

هجاوب ع البست حاضر بس ممكن هخليه بعد البوست اللى جى

ممكن ممكن ها

مرمر أجابات جميلة و طبيعية

(:

أنا بحب أحسان عبد القدوس

ربنا ما يحرمنيش من تدبيسك

(:

ربنا معاكى

ويكا يقول...

اوباااااااااااااااا

انا اتفضحت يا رجااااااااااله.

اولاً ، انا من مزنقى هذا احب اسأل عن ابن ال .... الراجل الطيب اللى زقنى .....
هههههههههههه
ماشى يا ست مرمر ، كدهه ، بقى ده بوست تدبسينى فيه ؟!!
كله كتب؟!!!

طب اعمل ايه انا دلوقتى؟!!!

وانا اللى جاى طيران مفكر ان الدعوه اللى انتى قولتيلى عليها هناك دى ، دعوه على العشاء ولا الفطار؟!!
وجاى وسبت فطارى وقولت البت مرمر بتعمل اساسا اكل حلو ، يطلع ناقبى على فاشوش كده.
الله المستعان.
انتى قريتى الكتب ده كلها ؟!!
وبتقوليلى مش بحب الاقنعه ؟!!
.......... تييييييت .....

على فكره ، انا ماكانشى فيه اى جديد بالنسبالى فى البوست ده.

:)
غير كم الكتب اللى انتى قولتيه ده

Noha Saleh يقول...

انا فاهمة قصدك بالنسبة لكلمة اقنعة
وبعدين اللى يبقى عندها الاجابات دى اكيد مثقفة طبعاومش بتضع اى اقنعة
بلاش تواضع يامرمر انا مش عارفاكى شخصيا بس من كتاباتك انتى انسانة جميلة فعلا

باحث عن حب يقول...

ربنا يبارك فيكى يارب يام لولو
يابر يوقومك بالسلامه يارب

mrmr يقول...

حبى الجميل
انا حبيبتى عارفه جيدا رايك
ربنا يديم الحب والورد
وربنا يعفى عنك
ومنتحرمش ابدا عنك
رمضان كريم

mrmr يقول...

داليا
مرسى يا قمر
ديما منورانى وواخده بحسى
ربنا يسعدك

رمضان كريم

mrmr يقول...

حواديت
شريكى العزيز
شكرا لكلماتك التى اطربتنى
والشرف ليا انا لانى اتعرفت على شخصيه حقا جديره بالاحترام والتقدير
فلك منى ارق تمنياتى بالسعاده
وربنا يكرمك ويوسع فى رزقك
ويعطيك على قد نيتك وقلبك الطيب

واحب اقول ان نجاح المدونات ده ثمره مجهودك وتعبك وسهرك الليالى فى المدونات

كل سنه وانتى طيب يا راجل يا طيب
رمضان كريم

mrmr يقول...

رامى
سامحنى اذ كنت دبستك

شد حيلك واعصر دماغك

ههه

ربنا يسعدك

mrmr يقول...

ويكا
معلش يا بطل انت قدها وقدود
كان نفسى ادعوك للفطار
بس وجبه الفطار مش هنا
ح تلاقيها فى ركن المراه او مكتبه الفيديو لكن هنا مش ح تلاقى غير بعض الكلمات فى بعض الاحيان مش ديما بحسها فى الصميم

انت يا عم ويكا بتتريق عليا على الكتب والرويات يا عم خلى الطابق مستور دى شويه روايات على مر كام سنه مش كتير

شكرا ليك ومنتظره تلبيه الدعوه عن قريب

رمضان كريم

mrmr يقول...

نهى
حبيبه قلبى
رحم الله امرا عرف قدر نفسه
ده مش تواضع دى حقيقه

مرسى يا حبى انت الاجمل يا قمر
ربنا يديم المحبه

رمضان كريم

ويكا يقول...

ياباشا

الدعوه ستلبى قريب ان شاء الله وفى اقرب فرصه, بس اخلص الحاجات اللى مزنوق فيها اليومين دول دى وحتى اكون فكرت فى حل فى المزنق ده.

وبعدين بتريق ايه ، اصبرى اصبرة لما تشوفى الفضايح وانتى تعرفى.


سلام

mrmr يقول...

ويكا
ربنا يفك ذنقتك

اطربنى اطربنى بحب اسمع

اكيد محضر مفاجات

ربنا يستر

Haytham Alsayes يقول...

جميل القراءة
بداية النهضة لكل شىء

تحياتي

mrmr يقول...

هيثم
اهلا بيك
نورتنى

رمضان كريم

أبو فارس يقول...

اعجبني الرد علي الاساله جدا
ومكنتش ناوي اعلق لاني والله ماني فاضي ارد علي التلفون اللي في يدي
ونتي اكيد عارفه رمضان وشغل والبيت
بس الفقره الاخيره في البوست هي التي ارغمتني علي ذالك
حبيت اقلك بالعكس انتي زاد غلاكي في قلوبنا والله... واللي مش عاجبه بحر العريش مفتوح يشرب منه علي حسابي..
متقوليش كدي تاني ياريت..
علي شان خاطري احنا عرفنكي مرمر وبس
وكل عام وانتي في احسن الاحوال ربي يحفظك من كل سواء...
دمتي بنعمه وعافيه اختي العزيزه مرموره
تحياتي

mrmr يقول...

ابو فارس الهمام

بجد لسانى عاجز عن كلمه شكر فانت اخ فاضل وعزيز

ربنا يسعدك

لك منى كل تقدير واحترام

رمضان كريم

template by Osama hosny 2009