الثلاثاء، 17 أغسطس 2010

ح تقول ايه ؟؟

الووو .. الوووو ... الووو
واحد .. اثنين .. ثلاثه
المايك شغال ؟
تمام علشان الكل يسمعنى  كويس
احم احم

مسااااء الورد والفل
مش عارفه ليه نفسى ارغى معاكم انهارده
انا زهقانه وقرفانه
واليوم انهارده ممل وملهوش طعم
والروتين ح يموتنى
بس اطمنوا مش ح ارغى كتير هما حبه صغيره مش ح اطول
اصلى ماليش فى الرغى ولا اللك والعجن
وجاتنى دلوقتى فكره مجنونه يعنى مجنونه
الفكره دى ايه
خيرررررر ربناااا يجعله خيررررررر
تخيل نفسك الان انك ماسك مايك
وان العالم كله دلوقتى بيسمعك
ح تقول ايه ؟؟؟؟؟ 
ونفسك توصل ايه للعالم
اى حاجه فى نفسك اعملها علطوووووول
اللى عايز يصرخ يصرخ
اللى عايز يلطش فى اللى جنبه مايترددتش
نفذ علطوووووول
معلش اصلها افكار مجنونه

أنشر الموضوع فى المفضلات الاجتماعية من هنا



Digg Technorati del.icio.us Stumbleupon Reddit Facebook Twitter

58 التعليقات:

ويكا يقول...

احم احم احم

ايوه
نق نق نق نق

ايوه دا فعلا شغال ، طب هو انا على الهوا كده ولا ايه ؟!!

استر يارب

طب انا اللى عايز اقوله دلوقتى ما ينفعشى يتكتب هنا ....

وبالذات ان حضرتك مش عامله موديريشن على التعليق
هههههههههههههه

mrmr يقول...

ويكا
العالم كله ح يسمعك اتفضل معاك المايك

ويكا يقول...

يالهوى
انا شيلت الليله ولا ايه؟؟؟؟!!!

ما علينا

احمممممم احمممممم

كوووو كووووو كووووو

سورى يا جماعه اصلى عندى كحه

اممممممممم
انا بنتهز هزه الفرصه ومن مزنقى هزا احب اوجه
كلمه للعالم كله اقوله فيها :
اوعوا تفتكروا الحوادث اللى بتحصل للمسلمين دى اثرت فييييينا ، ابسلوتلوتلى ........
بالعكس
احنا اللى اثرنا فى الحوادث .

وعلى فكره الحوادث دى عملتلنا دماااااغ ، ودماغ كبيره كمااااااان

ومع السلام عليكم ورحمة الله وبركاته

اخوكم اللمبى
اااقصد ويكا

mrmr يقول...

شكرا يا لمبى

أأأأأقصد يا ويكا

رسالتك للعالم وصلت

ويكا يقول...

ايه ده

فين الجايزه؟؟؟؟

mrmr يقول...

هههههههه

شكلى كده ح ادبس فى جايزه

انا مش عامله مسابقه يا ويكا

باحث عن حب يقول...

جنان فى جنان

ايها اعالم انا عالمى مدينتى هقول مش الالعم كله ولا حتى العربى
هقول يا اهل مصر
سهولوا امور الزواج على الشباب
نسبه العنوسه كبرت جدا
والاولاد عنسوا قبل البنات
من اللى بيشفوه فى الشوارع والتليفزيونات
وام شعر اخضر واصفر
يا اهل مصر
سهلوا امر الزواج تتقوا شرور التحرش والاغتصابات
والدين ينتشر بحفظ النفس وكل واحد يشوف بنت يقول زى بنتى او اختى
يا أهل مصر الاغنياء
وفروا مساكن للشباب للزواج ابنوا مصانع وشركات شغلوا شباب مصر بدل ماهما على النت والاباحيه ليل ونهار وفى الفراغ على القهوه يبات وينام وفى المخدرات يعوم ودماعه تبقى زى المصفه
يا أهل مصر
حسبى الله ونعم الوكيل

ويكا يقول...

انا ماليش دعوه

انا عايز جايزه

يا اما تقوليلى السر اللى انتى مخبياه
هههههههههه

وبعدين هو انا صاحى على اطلع على المايق وانبح فى صوتى علشان الناس دى كلها تسمع على الفاضى!!!!!

دا انا صوتى راح ، شوفى انتى بقى كام واحد سامعنا لغاية دلوقتى

باحث عن حب يقول...

ياشباب
بلاش كلمه الحب الكدابه اللى فى عقولكم دى وفى قلوبكم من غير امكانيات
ولا حتى متعرفش تجيب لقمه عيشك
بلاش نكدب على بعضنا باسم الحب
شكرا مرمر

♥ ♥ Amira Samy ♥ ♥ يقول...

فكرة جميلة و مبتكرة
و كل الى انا عاوزة اقولة
أتقال و خلاص
ابدعنا بأفكارك الجميلة
دايماً كدة
رمضان كريم

mrmr يقول...

محمود ايه ده يا محمود

ههههههه

انت ما صدقت تمسك المايك واتفتحت اتاريك يا واد مشحون وعندك كبت طلع طلع كمان وكمان

بس الله ينور كلام متوازن ومعقول

ربنا ينور طريقك وطريق الشباب

mrmr يقول...

ويكا
السر ان طلع من بين اثنين مش يبقى سر
العالم كله حيسمع ويكا عايز يقولهم ايه

محدش يعرف السر غير الحب الجميل

ودى صحبتى مش بطلع اسرارنا لحد

ثانكس

mrmr يقول...

فعلا يا حوده
معظم الشباب بيضحكوا ويخدعوا البنات باسم الحب
وكتير من البنات عارفين كده لكن حابين ينخدعوا لانهم هايفين
اهم شئ كل واحد وواحده يثبت علاقه بربنا علشان مش يغضبه

( وربنا يجعله ادب لا غضب )
الله يرحمك يا ماما كانت تملى تقول المقوله دى
نورتنى يا حوده

mrmr يقول...

سلسبيل
افتكر ان محمود قال اللى انت عايزه تقوليه
وسلت رسالتك للعالم

شكرا يا قمر

ساسو يقول...

مرموره
انا بجد اكتر حاجه مضيقاني ونفسي تتغير
ان البنات يقعدوا في البيت والشباب يشتغلوا
بجد
دلوقتي كل واحد عايز حد يشتغل عنده
يكتب انسه انسه انسه
حرام كده والله
امال الشباب يعملوا ايه
يبقا منلومشي اي شاب ينحرف
اي شاب يمشي في طريق خطأ
بجد الدنيا حالها واقف اوي

غير معرف يقول...

ههههههههههههههههه
ايه دا انا كدا على الهوا على طول؟؟؟
ايه اللى انتى وويكا ومحمود وساسو عملينه ده

انا صايمه يا جدعان وهقول كلمتى بعد الفطار الا الغبط
هههههههههههه

بس بجد ضحكتونى
ولا السر دا
هههههههههههه
ويكا هيمووووت ويعرفه

بجد انت مشكله يا حبيبتى

ويكا يقول...

الحب الجميل

انا واثق يا باشا ان انتى اللى هتقوليلى على السر ده ، علشان احنا اصحاب.
هههههههههه
ومرمر دى وحشه مش عايزين نعرف منها حاجه ......
احنا مخصمنها خلااااااص.

صح يا حب يا جميل ولا ايييييه؟؟؟

Ramy يقول...

مرمر

ليه الأحراج دة بس
(:

تثأ تثأ تثأ

ايه دة يا عم رامى

بأعمل زى أحمد حلمى فى فيلم ظرف طارق

مش عارف هقول ايه و لا ايه

و لمين و ليه

خلاص مش عارف اقول و لا أتكلم

مش عارف

معلش بقى (:

mrmr يقول...

يالهوووووووووووى عليك يا ويكا
انت خلاص مالكش حل
خليك كده على نارك حتمووووت وتعرف السر
برضه محدش مننا ح يريحك
وبعدين الشاب المهذب مش يسأل وحده هذا السؤال ملكش حق
ههههههههههههههههه

mrmr يقول...

رامى
كلالالالالالالالا والف كلالالالالالالالا
فكر مع نفسك وشوف عايز توصل ايه للعالم خد فرصتك يا رجل
واغتنم الفرصه لانها لا تعوض وشارك معنا افكارنا المجنونه

غير معرف يقول...

ايه دا بقا
؟؟؟؟؟؟؟؟؟؟؟؟؟
لا يا ويكا احنا اصحاب بلوجر واحد اه بس مقولش السر كدا وانا صايمه
هههههههههههههههههههه

غير معرف يقول...

مرموره انتى هنا؟؟؟؟؟؟؟

mrmr يقول...

شاطره يا حبى انا واثقه فى حبى قووووى
وقلبى مش بيكدب عليا
مرسى يا قمر
افتحى الياهووو ياللا وحشتينى

غير معرف يقول...
أزال المؤلف هذا التعليق.
غير معرف يقول...

افتحى يا ست الكل انا اون لاين

Ramy يقول...

حرام عليكو هتتفقوا ع الراجل (:(:

Ramy يقول...

اوعى يا حب يكون السر فى حاجة تتاكل

علشان بأعمل رجيم (:

شمس النهار يقول...

فكرة لطيفه

تشجع الشعب المصري انه يصرخ بصوت عالي

بدل السكات

:))

ويكا يقول...
أزال المؤلف هذا التعليق.
ويكا يقول...

اوبااااااااااا

انتوا عملتوا عليا رباطيه ، مااااشى

عموما ، انا كنت بسأل فعلا مش غتاته ، بس فعلا لانى لما بشوف تعليقات او كلام مرمر (طريقتها بوجه عام) بحس انى رجعتى عندى حوالى خمس ست سنين تانى ، وممكن اجرى ورا المدونين كلهم وارشهم بالمايه او ارمى علي دماغهم الشنط من الدور التالت من المدرسه تانى.
ههههههههههههههه

بجد والله بتعملى حاله غريبه كده من البهجه والطفوليه (ولعب العيال) p:



فكنت عايز اعرف الشخصيه دى فى الحقيقه شكلها ايه ، لا تبقى مصيبه ويكون عندها فعلا 7 سنين p;

غير معرف يقول...

رامى
لا يارامى مش حاجه تتاكل متقلقش
ههههههههه
اسأل عم ويكا وهو يقولك
ههههههههه

غير معرف يقول...

ههههههههههههه
7 سنين؟؟؟؟؟؟؟؟؟
لالا
كدا كبرتها اوى يا ويكا
ههههههههههه

مرمر فعلا كلها مرح ربنا يحميها
عسولة المدونات دى

mrmr يقول...

ساسو
الله يرحمك يا قاسم يا امين هو السبب فى طلوع البنت للعمل
لكن دلوقتى البنت لو مش بتشتغل ملهاش عازه
الشاب من دول بيشترط ان لازم البنت تكون بتشتغل وتساعد علشان المركب تقدر تمشى
وعلى راى المثل ( القفه ام ودنين يشيلوها اثنين ) هههههه

بس كل واحد صاحب عمل عايز انسه ده لسببين
1- انها تكون فاضيه مش وراها عيل ولا تيل ولا زوج ينكد عليها عشيتها وتتاخر كل يوم عن الشغل
2- ان الانسه الصغنونه بتكون دمها خفيف لسه مش شايله الهم والدنيا فوق دماغها وبتضحك وتبتسم فى وجوه العملاء وده بيعمل جو حلو لمكان العمل

لكن الشاب عليه يدور فى داخله الاول ويعرف ايه قدراته على العمل واى مجال يحب يشتغل فيه

وربنا يفتح باب رزق للجميع باذن الله

نورتينى يا ساسو
ربنا يسعدك يا غاليتى وتسلم خطوتك

mrmr يقول...

حبى الجميل
منتظراكى يا قمر بعد ما تعمرى الطاسه علشان تركزى كويس فى رسالتك اللى ح تقديمها للعالم
لما نشوف ح يطلع ايه منك يا جميل

افطارا شهيا باذن الله

mrmr يقول...

رامى
قول اللى انت عايز تقوله
قولى حاجه اى حاجه قول يخرب بيوتكوا ذى ما تحب
اتفضل يا رامى المايك مع سيادتك

mrmr يقول...

شمس النهار
اهلا بيكى يا قمر
والف الف سلامه عليكى ربنا يعفى عنك وتقومى بالسلامه
بجد انا حاسه بمعاناتك قوى باذن الله حتقومى بالسلامه وربنا يكمل شفاكى على خير يا قمر
انا كنت فعلا ناويه ازورك فى مدونتك واسأل عليكى لكن انت سبقتينى
لكن ضرورى انا جايه انتظرينى بمعزيات رمضان القطايف والكنافه والبسبوسه عايزه ادوق اكلك يا قمر


نورتينى وربنا يسعدك

mrmr يقول...

ويكا
انت زعلت
بص يا ويكا احنا كلنا بنحب بعضنا وبنرسم صوره فى خيالنا لكل شخص الصوره دى خاصه بكل واحد فينا تطلع حلوه تطلع وحشه دى حاجه راجعه لمخيلته
لكن لو حابب تعرف بالتقريب ح تعرف من البوستات القديمه
لكن مش اقصد انك غتييت لاسمح الله

وبعدين ترجع خمس ست سنين وتجرى ترش المدونين بالميه هو انت كام سنه
ههههههههه

بس اكيد ده دليل على قلبك الطيب الصغير الابيض قلب طفل نقى

وبعدين 7 سنين يا مفترى كده تكبرنى ههههههههه

ربنا يديم المحبه والتواصل
بجد انا سعيده بيك يا ويكا

رمضان كريم

mrmr يقول...

حبى الجميل

انتى يا غاليتى اللى قلبك جميل وعسوله
وصاحبه صاحبتك
ربنا ميحرمنى منك يا قمر ويباركلى فيكى ويخلليك لولو وابو لولو

افطارا شهيا باذن الله

ويكا يقول...

لا لا بالعكس خالص انا ما زعلتش

بس حبيت افهمك انا بسأل ليه بس.

اما بالنسبه لهوا انا عندى كام سنه

هههههههههههههههه

انا قولت "رجعت بقى عندى خمس ست سنين " يعنى مش بالناقص ، لا سنى يعنى

وبعدين انا غالبا اكبر منك بكام سنه يعنى بالكتير حوالى 12 سنه كده ولا بتاع . :)

نيهاهاهاهاهاهاهاع

ويكا يقول...

مرمر

انا فاتح عينى دلوقتى على الاخر ومش عارف اقول ايه .

انا شفت بعض التدوينات بتاعتك بالفعل ، وركزت فى شوية حاجات فى السايد بار بتاعك .

كل اللى اقدر اقولهولك انتى وكمان الحب الجميل ، وبعض المدونين الاخرين اللى لسه متعرف عليهم حديثاً ، انى انا مبسوط حقيقى جدا من انى اتعرفت على جيل جديد من المدونين ، المتصالح مع نفسه ، جميل المشاعر نقى النفس والكلمات.
فتنضح نفسه بكلمات بسيطه الا انها تمس شغاف القلوب ، بسرعهة وسهولة عجيبه.
انا لسه ما اتجولتش كتير ، بس اكتشفت ان مش الشقاوه دى بس اللى انتى تمتلكيها ، لا نفس وعقل وروح حالمه اجمل بكثير.

انا حقيقى سعيد انى عرفتكم.

وسمحيلى اقةل انى الان اشعر بارتياح نفسى غريب ، وطمأنينه .
فبعد ان كنت قد فقدت كثيراً من الامل ، واصبت بكثيرا من الاحباط الا ان مصر لازالت بخير.

دمتم بخير جميعاً

نفسى تفرح بيا يارب(الشهاب) يقول...

السلام عليكم
كل عام انتى بخير
عاوز اقول كلمه للحرميه
واللى مسؤولين عن سرقه خيرات البلد
مصر للمصريين مش للمنهوبين
وكفايه احسن نصيف
فى الواحات
كل سنه وانتى طيبه يا مرمر

mrmr يقول...

نفسى تفرح بيا يارب

كل سنه وانت طيب
ولا يهمك يا باشا قول ذى ما تحب
متخفش لما تروح المصيف ابقى اجى ازورك وكرم منى ح اجيبلك زياره حلوه مش عيش وحلوه لالا دى بقيت موضه قديمه
انت بس اعملها ومتعلش الهم

رمضان كريم

mrmr يقول...

ويكا

كد ما انت سعيد
انا كمان سعيده بمعرفتك وتشريفك لمدونتى
ربنا يديم المحبه

ولك كل احترامى وتقديرى

أتنين حبيبين يقول...

سلامو عليكو

عاوزه أقول

أنى بحبك يا حسام أوووووووووووووى

وربنا ما يحرمنيش منك يارب ويسعدك

ويجمعنى بيك على خير
ونفسى ربنا يسترها معايا

ويشفى أمى ومرضى المسلمين
اجمعين
ورمضان كريم

mrmr يقول...

توتا

امين يارب

تنولى اللى فى بالك ويشفى ماما يارب
ويباركلك فى حبك وفى ماما

باحث عن حب يقول...

اخبارك ايه ادعوكى الى
http://elbanany.blogspot.com/2010/08/blog-post_18.html

عمرو يسرى يقول...

تك تك الو واحد اثنين لا فعلا شغال احب اقول 0000000000000000.
0.0.0000000000000000.0.0.0....000000 دا كان كلام فى السياسه وشكرا لاتاحه الفرصه للكلام واسف للاطاله

mrmr يقول...

محمود
وصلت الدعوه ولبيتها والف مبرووووك ربنا يجعلها مدونه خير وحب بالنسبالك

mrmr يقول...

عمرو يسرى

ههههههههههههههههههههه

كل ده كلام طيب خلى بالك لحسن تصيف فى سويسرا وتجرجرنى وراك فى اللحظه دى ح اقول معرفهوش
حتى الزياره ح امتنع اجبهالك

هههههههههههه


رمضان كريم

عمرو يسرى يقول...

على طول تبعينى كده ماكنش العشم يامرمر
دا انا جاى اعزمك عى مدونتى الجديده www.khwater-amr.blogspot.com
وديه كمان
www.story-amr.blogspot.com
الاقيكى تبعينى كده ليه الصدمه ديه ليه
ههههههههههه
كل سنه وانتى طيبه

تيمور يقول...

اقول لوزير الزراعة

وفر القمح للبد توفير ذاتى عن طريق زراعتة فى مصر

افضل من الاستيراد والشحاتة واكلنا يكون فى ايد حد غريب وبس

تحياتى

عمرو يسرى يقول...

معلش كتبتلك عنوان الثانيه غلط
العنوان الصحيح
www.amr-story.blogspot.com

داليـ ـ ـ ـ ـ ـ ــــا يقول...

الو
الوو
الووو
الوووو
انا نسيت الكلام ولا ايه
معلشى ياجماعه انا مرتبكه متنسوش انى كده على الهوا
خلاص هعيد من تانى
ومن الاول خالص
الو
الوو
الوووو
الوووو
تانى نسيت اهوه
طيب يامرمر ممكن ادينى فرصه اجمع افكارى وابقه اجى اسمعها
هههههههههههه



خلاااااااااااص حضرت اللى هقوله

هقلهم يانساء العالم اتحدوا
خلينا ايد واحده ونمحى الرجاله من ع وجه الارض
ههههههههههههههههه

mrmr يقول...

يوميات رجل مش عايز يتجوز

مرحبا بيك صديق للمدونه
انت ميه ميه انا ح ارشحك وزير للزراعه علشان توفر القمح للشعب
نورت

رمضان كريم

mrmr يقول...

عمرو
حاضر من عنيا اروح واقرا حالا

mrmr يقول...

دولى حبيبه قلبى

مالك يا قمر متلخبطه ليا
على اقل من مهلك محدش بيجرى ورانا
خدى نفس عميق
اه
واحد
اثنين
ثلاثه
ايوه كده
تمام
يالهوووووى يعنى تسكتى تسكتى وبعدين تقلبيها على الرجاله هههههه
طيب احنا نتفق على الرجاله المفتريه بس
بلاش كلهم وحياتك
لحسن في حد غالى عليا قوى مقدرش ابد اتفق عليه
هههههه
اعمل ايه اصلى بمووووووت فيه
هههههه
نورتى يا قمر
ربنا يسعدك وبلاش الافكار الشريره دى

داليـ ـ ـ ـ ـ ـ ــــا يقول...

مييييييييييييييين هو الراجل اللى متقدريش تعملى كده فيه
؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
محتاجه اجابه

mrmr يقول...

دولى
عايزه تعرفى الشخص اللى مقدرش ابدا اتفق عليه
هو حبيب عمرى وشريك حياتى ومقدرش ابدا اتنفس الهواء من غيره

template by Osama hosny 2009