الثلاثاء، 29 يونيو 2010

!!! دى مش روشنه


عمرك جربت تعمل مقلب في حد وقولت .. بهزر؟
أو ضحكت علي بنت وأقنعتها
او عيشتها فى قصه حب وهميه ؟
طب حد اشتغلك أنت قبل كده؟
ولا حد ادالك مقلب محترم قبل كده؟
ولا انتي عملتي مقلب في ولد قبل كده؟
بتحب تعمل افلام علي الناس؟
تفتكر لو اتعمل فيك مقلب
 أو حد اشتغلك هيكون موقفك إيه؟

طب تفتكر هتتقبل كده؟
لو أنت بقي اللي عملت مقلب فى حد هتقبل رد فعله ولاهتقول داانا بهزر معاك ؟ متكبرش الدنيا كده ؟

دا نوع من الترويش
كل الشباب بيحبوا يعملوا كده ونقول بنهرج وبنفرفش عشان الدنيا ماتبقاش جد أوي وخنقه.

لكن أوقات بيحصل معانا مواقف
 مش بنقدر نتحملها أو مش بتعدي بتهريج غير إن هي ممكن تجرحنا زى مثلا:

لو ولد اشتغل بنت ومقضيها تليفونات ومقابلات وكلام جامد، وفي الآخر تكتشف إنه اشتغلها وطبعا تكون صدمه للبنت وجرح.

غير بقي المقالب السخيفة اللي بتحصل بتتحط تحت مسمي التهريج والهزار والروشنه والترويش.

خد بالك بجد لحسن أوقات الدنيا بتقلب جد
 والموضوع بيكبر ويكبر
 غير انه لو كان مقلب جامد ممكن يسبب مشاكل
وممن يخليك تخسر ناس كتير
 وناس كتير تفقد الثقة فيك.

كل حاجه لازم يبقي ليها حدود
 ماتسمحش لنفسك تتعدي الحدود ديه مع غيرك
 ولا تسمح لغيرك يتعدي الحدود ديه معاك
ولازم تعمل حساب لمشاعر غيرك
علشان الناس تعمل على مشاعرك

كويس أوي إن إحنا نهزر نهرج وتبقي الدنيا مرحه  لكن لازم نفكر قبل مانعمل حاجه عشان الدنيا ماتتقلبش علينا
ونقول ياريت اللى ما جرى ما كان
ونخسر اعز ما لينا

أنشر الموضوع فى المفضلات الاجتماعية من هنا



Digg Technorati del.icio.us Stumbleupon Reddit Facebook Twitter

18 التعليقات:

Ramy يقول...

انا طبعا كنت مصيبة فى موضوع المقالب دة فى الكلية

بس موضوع البنات ده طبعا دة مش اسمه هزار سورررى دى سفالة انا اسف

انا احب اهرج مش اكسر قلب حد او اوجع مشاعر حد التهريج والمقالب ليها حدود ولا توضع مشاعر الأخرين تحت بند التهريج

دة رايى يحتمل الصواب او الخطأ

بوست جميل بس ينرفز(:(:

Ramy يقول...

طبعا مفاجأة اول تعليق و معاه كيس جوافة كمان

بس خلولى شوية (:(:(:

غير معرف يقول...

يامرموره كلامك كله عبر بكسر العين

الصراحه مش بحب المقالب اوى بس احب المفاجأت

بس لومقلب بسيط ويعدى بدون زعل بتعدى وخلاص

مقالب فى كله ماعدا ان الشاب يحب فى بنت ويتسلى بيها ويقول فى الاخر مقلب سورى فى اللفظ ميبقاش انسان سوى

هزار على الماشى ويكون هزار خفيف
مقالب بين الاصحاب بيكون جميل بس ميطولش وميزدش عن حده زى ماقولتى ياقمر

مرمر عايزه جوافايه من اللى رامى جايبها دى

دمتى بخيررررررر
ههههه

mrmr يقول...

رامى
اهلا بالشاب الروش المصيبه فى الترويش
اكيد طبعا مش كل الشباب اللى بيشتغل للبنات وبيضحكوا عليهم باسم الروشنه
الشاب المحترم ابن ربنا مش ده اسلوبه ابدا وانا واثقه انك شخصيه محترمه

وبعدين خد هنا
انت جايب كيس الجوافه وعينك فيها
يا خوفى يصيبنى مغص منها ولا يجيلى تسمم جوافى
شكرا ليك يا روش
ربنا معاك ويحافظ عليك

mrmr يقول...

حبك جميل
سعات بتبقى في مقالب دمها شربات
على فكره انا من عشاق المقالب بس مقالبى دمها خفيف وليها حدود

وبعدين يا جميل هو اى حد ح يدخل يبقى عينه فى كيس الجوافه
طيب انا ح اخبيه علشان مش يبان
لكن علشان خاطرك ليكى منى واحده بس
ولا تحبى اعملك عصير باللبن
شكرا يا قمر
ربنا معاكى ويحافظ عليكى

BNT ELISLAM يقول...

السلام عليكم ورحمه الله وبركاته
ازيك امرمر
قبل ماقول تعليقى انا شايفه كيس الجوافه الى انتى مخبياه انا عاوزه واحده

اولا موضوع المقالب ده جميل انا برده بحب المقالب بس الخفيفه وقبل مابفكر فى مقلب
اكون مفكره فى نتايجه ورد فعل الى قدامى

وبعدان عمر ماالحب يبقى مقلب
المشاعر لو دخلت فيها المقالب تبقى تجريح وميبقاش انسان طبيعى الى بيعمل كده

وبرده مش همشى غير لما اخد الجوافه بتاعتى

mrmr يقول...

بنت الاسلام
يوووووه طيب يا ربى اخبيه فين بس
كله طمعان وعشمان فى الجوافه على العموم خلينى انا كريمه كريمه تحبى الجوافه للاكل ولا عصير ذى اللى ح اعمله لحبى الجميل

طبعا يا قمر عمر ما كانت مشاعر الانسان لعبه فى ايدين الشباب الروشين اللى بيطلق عليهم روشين يعنى
دى بتبقى استخفاف بمشاعر الناس
ودى بتبقى عواقبها شديده
ياريت كل شاب يراعى ربنا فى البنات
وميكسرش بقلبهم

شكرا يا جميل ومتنسيش تشربى العصير قبل ما تنامى
ربنا معاكى ويحافظ عليكى

أتنين حبيبين يقول...

وحشتينى
وحشتينى

اخباراتك ايه
بصى بقا انا بكره المقالب لانها بتتعمل فيا مش انا اللى بعملها وباخد على خاطرى وبصدق والله

وخسرت ناس كتير بسبب الموضوع ده
ياريت كلنا نحاسب على اى تصرف نعمله
لان كل شىء هنتحاسب عليه
ربنا يكرمك
بجد مبسوطه بيكى وبموضوعاتك الرائعه وموضوع الحصان ده تحفه
الله عليكى
مودتى

بلال عادل رجب. يقول...

يوووووووووه
كنت بعمل مقالب كتير
بس دلوقتى مش كتير
بقيت بعمل مقالب حبه صغار
وطبعا
لما اكون عاوز اعرف اللى انا عامل فيه مقثلب مش على طول بجيبه حبه حبه علشان يقبل الهزار

mrmr يقول...

توتا
حبيبه قلبى
ازيك يا عمرى
هههههههه تعيشى وتاخدى مقالب ولا يهمك
المهم يكون المقلب من غير ما يجرح شعورك
انا نفسى اعمل مقلب فى حد من اصدقائنا المدونيين بس مش ح اعرف
لانه مافيش علاقه مباشره علشان اعمل فيه المقلب
شكرا يا حبى

mrmr يقول...

قلــ"بـــلال"ــــــب فارس
اهلا بيك منورنى
خليك كده ادى مقالب ولا يهمك بس متنساش فى حدود للمقالب خليك حبه حبه
المهم يكون اللى ح تعمل فيه المقلب يتقبل دمك الخفيف
شكرا ليك وربنا معاك ويحافظ عليك

افروديت يقول...

عسل يامرمر بجد موضوعك جميل ..أنابعمل مقالب بس مش في ولاد خالص في صحباتي بنات وأرايبي كمان وهمابرضه بس ساعات بتكون لذيذة...أماموضوع أن ولديشتغل بنت فدابيبقي أوفر أوي وبصراحة في بنات بتستهبل..سلام يامرمورتي.

داليـ ـ ـ ـ ـ ـ ــــا يقول...

مرمريتا

كلامك صح

انا اتعمل فيا مقالب كتير اوى اوى
صحباتى البنات كانوا دايما يشتغلونى فى التليفونات ويسمعونى اغانى على ان انا افكر ان ده واحد بقه وعارف الاغنيه اللى بحبها وال ايه بيسمعهالى

وابن عمى بردوا يكلمنى موبيل ويشتغلنى على انه شاب معجب وكده بس على مين هزئته جامد ههههههههه

انا لو مش دماغى كبيره شويه كنت انشغلت بكل ده

بس انا بقه لما ابن عمى عملها فيا قمت ردتها له وفضلت اشتغله لمدة شهر كامل
وكنت معرفه مراته وانا وهى اتفقنا عليه بس لما عرف جه سود ايامى هههههههه

بس اوقات بتبقا ليها طعم جميل

تحياتى

mrmr يقول...

افروديت
اهلا بالعسل الابيض بالقشطه
انتى كده يتخاف منك قوى لحسن اجى فى يوم القى مقلب سخن
عارفه انا مش بعرف ادى مقالب خالص انا اللى بيتعمل فيا المقالب وكلها دمها خفيف بس علشان كلهم حبايبى فبستحملهم
نورتينى يا قمر
ربنا معاكى ويحافظ عليكى

mrmr يقول...

دولى
ازيك يا جميل
خطوه عزيزه ربنا ما يحرمنى من زيارتك ليا يارب
المقالب الخفيفه بتبقى ليها جمالها وافشتها انا بحب المقالب قوى لانها بتسيب بصمه جميله وذكرى حلوه فى حياتنا
احكيلك مقلب اتعمل فيا
انت عارفه الموبيلات الصينى بتبقى فيها حاجه خاصه بتغيير الصوت تخليه بنت او ولد المهم بيتغير الصوت
جه اخويا وكلمنى على انه وحده بنت وابتدى يتكلم فى حاجات شخصيه ويشتغلى كتير كل يوم لحد ما جنننى
وبعد فتره طويله من القلق والقرف وانا خلاص على اخرى راح قلى انا اللى كنت بشتغلك
وحياتك مش عارفه انا ايه اللى عملته فيه ساعتها بالضبط لقيت نفسى بانقض عليه وبفترسه وعضيته
ومن يومها بطل يشتغلى تانى
اهم شئ فى الاشتغالات متسببش اى الم ولا جرح وكله باسم الهزار والروشنه والاشتغاله معلش طولت عليك ياللا
ربنا معاكى ويحافظ عليكى

باحث عن حب يقول...

اسف على التأخير فى الردود
اولا
مدونه ابتسامات مش راضيه تنضاف عندى خالص
ثانيا

موضوع المقالب ده صعب قوى وعمرى ما جربته
ولا حد
عمله فيا
علشان
محدش يعرف رد فعلىى ايه؟
صعيدى بقه
لما تقفل معايا
والله ما بعمل حاجه
علشان طيب شويه بس خبيث
المهم
مووضوع اللعب بالمشاعر والبنات كده
انا مبحبهوش\
اللعب ببنات الناس صعب قوى
قوى
بس البنت هى اللى بتدى الفرصه للشباب
باسم الحب
وبس
معلش بقه
رد مش مظبط
يا مرمر

mrmr يقول...

اهلا محمود
لانك شخصيه جميله وجاده جدا
علشان كده مش بتحب تعمل فى حد مقالب
بس مش معنى انك تهزر وتعمل مقالب فى حد تبقى شخصيه غير جديره بالاحترام
بالعكس الاحترام موجود بس كل شئ وله حدود ذى ما قلت
نورتنى
ومن غير اعتذار انا مسمحاك على التاخير
المهم اطمئن عليك انك بخير
ربنا معاك ويحافظ عليك

مرايتى يقول...

الحمد لله ماليش فى المقالب
بس بجد فعلا فى مقالب بتوصل لمراحل خطيره جدا
سمعت عن مقالب ناس عملتها فى صحابها بجد ماتصحش جدا وتموت من الرعب وقلق وناس تعبت كمان جدا بسبب هزار

لازم نحكم العقل قبل مانتصرف أى تصرف ونحسب نتايجه ونشوف طبيعة إلى قدامنا

دى مش روشنه ولا خفة دم

بجد تسلم إيدك بوست هايل

template by Osama hosny 2009